*كتب: ســـعد الأوســـــي*
- طنين الذباب الإلكتروني يملأ المواقع والصفحات
- الأصابع المرتجفة على زناد الكيبوردات، حاسبات وأجهزة تلفون، بانتظار أوامر إطلاق النار على العدو الشرّير... (حضرتي طبعاً)....!!
- دولته عصبي وغاضب، يسب ويلعن ويهذي بكلمات نصف مفهومة:
"طاردوا سعد الأوسي، دمروه، هاجموه، لا تدعوا له صفحة تواصل أو موقعاً إلكترونياً أو تردد قناة تعمل. اضربوه بكل ما لديكم من قوة.
اخرسوا لي صوته.
استخدموا كل الوسائل.
زوّروا، اكذبوا، اخترعوا، مولوا الصفحات، اخترعوا لي قصصاً وارموها عليه"
- "أمرك أمرك... دولتك بس اهدأ.. أعصابك.. صحتك، أخاف يصير بيك شي.
دولتك خسرت الولاية الثانية وما انزعجت ولا اتعصبت كل هاي العصبية.. معقولة كلمة يكتبها سعد الأوسي تخلي دولتك بهاي الحالة!!؟"
- "ماا أريد أي نقاش، نفّذ ثم ناقش!!؟؟؟"
- "أمرك... دولتك"...قطع.
———————
أما أنا فداعيكم نايم في سابع نومة ببراءة ووداعة، كبراءة الأطفال، وما أدري شصاير بالدنيا.
صحيت، لگيت موبايلاتي مشتعلة بمئات الاتصالات والرسائل!!!
هاي شكو!!؟
شصاير؟
خير اللهم اجعلوا خير
الموبايلات ترن من جديد
رديت على أحد الأصدقاء الأعزاء:
"الو"...طبعاً بطريقتي الكاريكاتيرية المعهودة بيني وبين أصدقائي... يدينها أشواقي إحساسي أنفاسي تنهداتي.
الصديق: يمعووود انت وين؟
بيا معتقل بيا سجن بيا توقيف؟
أنا: يا توقيف؟ الله يصخم وجهك من الصباحيات
الصديق: يمعود صفحات ومواقع إلكترونية تابعة لواحد رئيس وزراء (سابق) صماخه عريض أمربع، نشرت خبر يگول انت وابن أخوك ذو الفقار مرتكبين جريمة خطيرة، وصدر عليكم أمر قبض، وعلى أساس عملوا لنا ملف استرداد وجابوكم للعراق وانتو هسه بالتوقيف.....!!
أنا: يا توقيف الأكشر هذا يا استرداد؟ ثم إني مو بنص بغداد كاعد ما طالع أصلاً للخارج هاي الفترة؟!!
عمي والعباس أبو فاضل نايم بفراشي بغرفة نومي ببيتي، وشخيري واصل لسابع جار.
الصديق: لعد ليش صفحات ومواقع (دولته) السابق، تارسه الدنيا أخبار وإشاعات تگول إنك مطلوب القبض عليك لأنك حاولت تاخذ فيزا لمجموعة من المصريين؟؟؟
أنا: الظاهر (دولته) من قهره وخيبة أمله صايرة بيه حالة نفسية ويريد يطلعها براسي.
وبعدين شبيهم المصريين؟!!
إخواننا وأبناء عمنا، وأجدع ناس.
هذا إذا صدگ إني أريد أتوسط وأطلع فيز لكم مصري، عمال غلابة على گولتهم.
الصديق: يعني الموضوع كذب؟
أنا: طبعاً كذب وتزوير وكلاوات ذباب إلكتروني.
وبعدين إذا ردنا نتحاسب على هيچ مواضيع خلي يگعد گبالي،
هو أني اللي جبت المصريين لو هو؟!!
كل مقاولات المجسرات العاوية مالته جابلها مقاولين مصريين وأحالها عليهم خارج الضوابط وبأضعاف أضعاف السعر، والعمولات فلل في التجمع الخامس وبشرم الشيخ وبالساحل والغردقة... والنتيجة الجسور كلها تخر.
الصديق: هههههه
اي والله حجي تخرخر من فوگ ومن جوّه.. أصلاً مرحلته كلها طلعت تخر، فساد وبوگ وعمولات ومشاريع عضروطية تعبانة، بحيث العراقيين كلهم يگولون رئاسته أفشل رئاسة بتاريخ الحكومات العراقية. فگرنا وطيح حظنا وطيّر البركة والخير من البلد تگول ططوه مو رئيس وزراء.
استلم الخزينة مليانة فلوس وذهب ودولارات وسلمها تصفر السماء والطارق.
أنا: يمعوود دعوفه بضيمه وقهره خطية، يومية طاگه عليه شغلة وطالعتله ملفات فساد جديدة.
وميدري شَيجبر شَيِسد شَيِلحم.
الصديق: يستاهل وحيل وأبو زايد، هو خله شي ما سواه:
تجسس على تلفونات الرئاسات والمسؤولين، مراقبة على الإعلاميين، توزيع مناصب الدولة لقرايبه وربعه وأبناء عشيرته، تهديد منتقديه وأصحاب الأصوات الحرة بسطوة الأجهزة الأمنية والمخابرات، مقاولات فاشلة... خله شغلة عوجه ما سواها!!؟؟؟
أنا: هسه شچلبت بيه، دعوفه.
أكيد كلهن راح يطلعن وقضاءنا العادل راح يقتص منه ومن أمثاله. الوكت غير الوكت والحساب جاي، وكل اللي أكله العنز راح يطلعه القضاء وتطلعه النزاهة. وعود خلي يفيده ذبابه الإلكتروني وكلاواتهم التافهة هاي هو ومشتاق...!
روح أخويه شوف شكو وراك أشغال وعوف هالسوالف التافهة، تره ذوله على گولة ذاك الرجال *ما يخوفون چلبي*.
طووووط طووووط
انقطع الخط.....خرب
---
*تنويه لا داعي له:*
صفحات الذباب الإلكتروني العاوية، التابعة لـ (دولته) المخلوع السابق، نشرت أني مطلوب القبض علي بمذكرات قضائية لمحاولتي - انتبهوا، *لمحاولتي* - التوسط لإصدار فيزا!!!؟
وطبعاً كل هالكلام كذب في كذب تافه.
*سؤال يطرح نفسه:* ذاك الرجال دخّل 8 ملايين مصري بالثمانينات، وما صار شي بالبلد، هسه البلد راح يجدّي من كم مصري حاول سعد الأوسي يطلعلهم فيزااا... *حاول*
والله عيب عليك يا أخي، اركد واعتدل وخليك بحجم الكرسي اللي كنت كاعد عليه 4 سنوات، حتى لو كنت فاشل وما تستاهله.
*(عود للحديث صلة)*
لأني قررت أرجع بكلامي وما أعوفك بحالك، وراح أفتگهن كلهن وحدة ورا الثانية.
وجيب ليل واخذ عتابة من الأوسي و (دولته). أقصد قناة الدولة الفضائية طبعاً....
ملاحظة لابد منها /:
ادرج لكم في ادناه أسماء صفحات الذباب الإلكتروني الذي يستخدمها دولته (( السابق )) لمهاجمة خصومه ومنهم العبد لله مع أنهم (( مايخوفون چلبي ))…..!!
وزير تشرين ، چالح محمد العراقي ، وزير السنة ، المكون الرابع ، سياسة ثورية ، وزير الحاج ابو إسراء ……!!
